Kulpati

(1) Kuladhipati dwara up-dhara (2) ke bandhon ke anusar gathit samiti dwara sansut teen vyaktiyon ke panel mein se teen varsh ki avadhi ke liye, aise nibandhon aur sharton par jaise ki pariniyam dwara vidhit ki jaye, Kulpati ki niyukti karega; parantu yah ki vishwavidyalaya ka pratham Kulpati rajya sarkar dwara niyukt kiya jayega tatha vah teen varsh ki avadhi ke liye pad dharan karega. (2) Up-dhara (1) mein vinirdisht samiti mein nimnalikhit vyakti honge, arthat: (k) Kuladhipati dwara namit ek vyakti; (kh) Vishwavidyalaya anudan ayog dwara namit ek vyakti; (g) Rajya sarkar ke uchh shiksha vibhag ke pramukh sachiv/sachiv, jo sadasya sanyojak hoga. (3) Samiti gunawagun ke aadhar par Kulpati ka pad dharan karne ke liye apayukt teen vyaktiyon ke naamon ka panel taiyar karegi aur pratyek vyakti ki shaikshik arhartavon tatha anya vishishtataon ke sankshipt vivaran ke sath use kuladhipati ko bhejeghi. (4) Kulpati vishwavidyalaya ka pramukh karyakari aur shaikshik adhikari hoga, jo ki vishwavidyalaya ke karyakalapon par samanya paryavekshan aur niyantran rakhega aur vishwavidyalaya ke pradhikariyon ke vinishchayon ko prabhavi banayega. (5) Jahan shikshak ki niyukti se bhinn koi aisi atyavashyak mamla ho, jismein tatkal karyawahi karna apekshit ho aur uske sambandh mein karyawahi karne ke liye is adhiniyam dwara ya uske adheen sashakt vishwavidyalaya ke kisi adhikari ya pradhikari ya anya nikay dwara is par tatkal karyawahi na ki ja sake to kuladhipati ke purvanumodan se Kulpati aisi karyawahi kar sakega, jo vah uchit samjhe. (6) Kulpati aisi anya shaktiyon ka prayog aur aise anya kartavyon ka palan karega, jo pariniyamon ya niyamavali dwara adhikathit kiye jaye. (7) Is adhiniyam, pariniyam aur adhyadesh ke bandhon ka nishthapurvak palan sunishchit karne ka kartavya Kulpati ka hoga.